ರಿಪ್ಪನ್‌ಪೇಟೆ: ಪರಿಚಿತನಂತೆ ಮಾತನಾಡಿಸಿ ಚಿನ್ನದ ಸರ, ನಗದು ಕಸಿದು ಪರಾರಿ..!

0
1921

ರಿಪ್ಪನ್‌ಪೇಟೆ: ಅಪರಿಚಿತನೊಬ್ಬ ಸಾಲ ಕೇಳುವ ನೆಪದಲ್ಲಿ ಮನೆಗೆ ಬಂದು ನಗದು ಹಾಗೂ ಚಿನ್ನದ ಸರವನ್ನು ಕಸಿದುಕೊಂಡು ಪರಾರಿಯಾದ ಘಟನೆ ರಿಪ್ಪನ್‌ಪೇಟೆ ಠಾಣಾ ವ್ಯಾಪ್ತಿಯ ಬಾಳೂರು ಗ್ರಾಮದ ಗುರುವಾರ ಸಂಜೆ ನಡೆದಿದೆ.

ಬಾಳೂರು ಗ್ರಾಮದ ಗಣಪತಿ ದೇವಸ್ಥಾನದಲ್ಲಿ ಅರ್ಚಕರಾಗಿರುವ ಕೃಷ್ಣಮೂರ್ತಿ ಭಟ್ ಎಂಬುವರು ಎಂದಿನಂತೆ ದೇವಸ್ಥಾನದ ಪೂಜೆ ಮುಗಿಸಿ ಮನೆ ಸಮೀಪ ಬಂದಿದ್ದರು ಆಗ ಅಪರಿಚಿತ ವ್ಯಕ್ತಿಯೋರ್ವ ಬೈಕ್‌ನಲ್ಲಿ ಬಂದಿದ್ದು ಪರಿಚಿತನಂತೆ ಅರ್ಚಕ ಕೃಷ್ಣಮೂರ್ತಿ ಭಟ್‌ರನ್ನು ಮಾತನಾಡಿಸುತ್ತಾ ಮನೆಯ ಬಳಿ ಬಂದಿದ್ದಾನೆ. ನನಗೆ ತುರ್ತಗಿ 20 ಸಾವಿರ ರೂ. ಹಣದ ಅಗತ್ಯ ಬಿದ್ದಿದೆ ಸಹಾಯ ಮಾಡಿ ಎಂದು ಕೇಳಿಕೊಂಡಿದ್ದಾನೆ.

ಕೃಷ್ಣಮೂರ್ತಿ ಭಟ್ಟರು ಮನೆಯ ಒಳಗೆ ಹೋಗಿ ತಮ್ಮ ಬಳಿಯಲ್ಲಿದ್ದ ಕೇವಲ 13 ಸಹಸ್ರ ರೂ. ಮಾತ್ರ ಇದೆ ಎಂದು ಹೇಳಿ ಆ ಹಣವನ್ನು ಅವನಿಗೆ ಕೊಡಲು ಮುಂದಾಗುತ್ತಿದ್ದಂತೆಯೇ ಆ ವ್ಯಕ್ತಿ ನಗದು ಹಾಗೂ ಭಟ್ಟರ ಕೊರಳಿನಲ್ಲಿದ್ದ 15 ಗ್ರಾಂ ತೂಕದ ಚಿನ್ನದ ಸರವನ್ನು ಕಿತ್ತುಕೊಂಡು ಎರಡು ನಕಲಿ ಮೊಬೈಲ್ ನಂಬರ್ ನೀಡಿ ತಮಗೆ ಊರಿಗೆ ಹೋಗಿ ಹಣ ಮತ್ತು ಬಂಗಾರವನ್ನು ಮರಳಿಸುತ್ತೆನೆಂದು ನಂಬಿಸಿ ಸ್ಥಳದಿಂದ ಪರಾರಿಯಾಗಿದ್ದಾನೆ.

ಭಟ್ಟರು ಕೆಲ ಸಮಯದ ಬಳಿಕ ವಂಚಿಸಿ ಪರಾರಿಯಾಗುವ ಮುನ್ನ ನೀಡಲಾದ ಮೊಬೈಲ್ ನಂಬರಿಗೆ ಸಂಪರ್ಕಿಸಲು ಪ್ರಯತ್ನಿಸಿದಾಗ ವಂಚನೆ ಮಾಡಿದ್ದಾನೆಂಬುದು ತಿಳಿದು ತಕ್ಷಣ ರಿಪ್ಪನ್‌ಪೇಟೆ ಠಾಣೆಗೆ ಬಂದು ದೂರು ನೀಡಿದ್ದಾರೆ.

ಇಂದು ಬೆಳಗ್ಗೆ ಶಿವಮೊಗ್ಗ ಪೊಲೀಸ್ ಹಿರಿಯ ಅಧಿಕಾರಿಗಳು ಹಾಗೂ ತೀರ್ಥಹಳ್ಳಿ ಡಿವೈಎಸ್‌ಪಿ, ಹೊಸನಗರ ವೃತ್ತನಿರೀಕ್ಷಕರು, ರಿಪ್ಪನ್‌ಪೇಟೆ ಠಾಣೆಯ ಪಿಎಸ್‌ಐ ಸ್ಥಳ ಭೇಟಿ ನೀಡಿ ಪರಿಶೀಲನೆ ನಡೆಸುವುದರೊಂದಿಗೆ ಆರೋಪಿಯನ್ನು ಪತ್ತೆ ಹಚ್ಚಿ ಕ್ರಮ ಜರುಗಿಸುವುದಾಗಿ ಹೇಳಿದ್ದಾರೆ.

ಕಳ್ಳತನ ಪ್ರಕರಣಗಳಿಂದ ಜನರಲ್ಲಿ ಆತಂಕ:

ರಿಪ್ಪನ್‌ಪೇಟೆ ಠಾಣಾ ವ್ಯಾಪ್ತಿಯಲ್ಲಿನ ಹಲವು ಕಡೆಯಲ್ಲಿ ವಾಹನಗಳಲ್ಲಿನ ಡಕ್ ಮತ್ತು ಕೃಷಿ ಇಲಾಖೆಯ ಕಬ್ಬಿಣದ ಗೇಟ್‌ಗಳನ್ನು ಕಳವು ಮಾಡಲಾಗಿದ್ದು ಸಾರ್ವಜನಿಕರಲ್ಲಿ ಆತಂಕಕ್ಕೆ ಕಾರಣವಾಗಿದೆ.

ಇತ್ತೀಚೆಗೆ ಸೋವಾರದ ಸಂತೆ ಮಾರುಕಟ್ಟೆಯಲ್ಲಿ ಓಮ್ನಿ ಕಾರಿನಲ್ಲಿ ಅಳವಡಿಸಲಾದ ಡಕ್ ಮತ್ತು ತೀರ್ಥಹಳ್ಳಿ ರಸ್ತೆಯ ಮನೆಯ ಬಳಿಯಲ್ಲಿ ನಿಲ್ಲಿಸಲಾದ ಕಾರಿನ ಡಕ್‌ಗಳನ್ನು ಕಳವು ಮಾಡಿಕೊಂಡು ಪರಾರಿಯಾಗಿದ್ದಾರೆ. ಬರುವೆ ಗ್ರಾಮದ ಕೃಷಿ ಇಲಾಖೆಯ ರೈತ ಸಂಪರ್ಕ ಕೇಂದ್ರದ ಮುಂಭಾಗದಲ್ಲಿ ಅಳವಡಿಸಲಾದ ಕಬ್ಬಿಣದ ಗೇಟ್‌ ಅನ್ನು ಬಿಚ್ಚಿಕೊಂಡು ಪರಾರಿಯಾಗಿರುವ ಘಟನೆಗಳು ನಿಧಾನವಾಗಿ ಬೆಳಕಿಗೆ ಬಂದಿವೆ.

ಜಾಹಿರಾತು

LEAVE A REPLY

Please enter your comment!
Please enter your name here