ಹೊಸನಗರ: ಬಡವರಿಗಾಗಿ ಸರ್ಕಾರ ಹಲವು ಜನಪರ ಯೋಜನೆಗಳನ್ನು ಜಾರಿಗೆ ತಂದಿದ್ದರೂ, ಅವು ನಿಜವಾದ ಫಲಾನುಭವಿಗಳಿಗೆ ತಲುಪುತ್ತಿಲ್ಲ ಎಂಬುದಕ್ಕೆ ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಅಡಗೋಡಿಯ ಈ ಘಟನೆಯೇ ಸಾಕ್ಷಿ. ಇಲ್ಲಿನ 73 ವರ್ಷದ ವೃದ್ಧೆಯೊಬ್ಬರು ಕಳೆದ ನಾಲ್ಕು ದಶಕಗಳಿಂದ ಒಂದು ರೇಷನ್ ಕಾರ್ಡ್ಗಾಗಿ ಸರ್ಕಾರಿ ಕಚೇರಿಗಳಿಗೆ ಅಲೆದಾಡಿ ಸುಸ್ತಾಗಿದ್ದಾರೆ.
ಅಡಗೋಡಿಯಲ್ಲಿ ವಾಸವಿರುವ ವನಜ ಶೆಡ್ತಿ ಎಂಬುವವರೇ ಈ ಸಂಕಷ್ಟಕ್ಕೆ ಸಿಲುಕಿರುವ ಹಿರಿಯ ಜೀವ. ಮೂಲತಃ ಉಡುಪಿ ಜಿಲ್ಲೆಯ ಕಾವಡಿ ಗ್ರಾಮದವರಾದ ಇವರು, ಬಾಲ್ಯದಲ್ಲೇ ಅಂದರೆ 12ನೇ ವಯಸ್ಸಿನಲ್ಲಿ ದಾಂಪತ್ಯ ಜೀವನಕ್ಕೆ ಕಾಲಿಟ್ಟು ತೀರ್ಥಹಳ್ಳಿಯ ಮಂಡಗದ್ದೆಗೆ ಬಂದಿದ್ದರು. ಬದುಕಿನ ಬಂಡಿ ಸಾಗಿಸಲು ಮಗನೊಂದಿಗೆ ಬೆಂಗಳೂರಿಗೆ ವಲಸೆ ಹೋಗಿದ್ದ ಇವರು, ನಗರದ ಜೀವನಕ್ಕೆ ಹೊಂದಿಕೊಳ್ಳಲಾಗದೆ ಮರಳಿ ಊರಿಗೆ ಬಂದು ಹೊಸನಗರದ ಅಡಗೋಡಿಯಲ್ಲಿ ನೆಲೆ ನಿಂತಿದ್ದಾರೆ.
ಸದ್ಯ ಯಾರ ಆಸರೆಯೂ ಇಲ್ಲದೆ ಒಂಟಿಯಾಗಿ ಬದುಕುತ್ತಿರುವ ವನಜ ಶೆಡ್ತಿ ಅವರಿಗೆ ವಯೋಸಹಜ ಕಾಯಿಲೆಗಳಾದ ರಕ್ತದೊತ್ತಡ (BP), ಮಧುಮೇಹ ಹಾಗೂ ತೀವ್ರ ಕಾಲು ನೋವು ಕಾಡುತ್ತಿದೆ. ದುಡಿದು ತಿನ್ನುವ ಶಕ್ತಿ ಇಲ್ಲದ ಇವರಿಗೆ, ಸರ್ಕಾರದಿಂದ ಸಿಗುವ ಅಲ್ಪ ಮೊತ್ತದ ವೃದ್ಧಾಪ್ಯ ವೇತನವೇ ಜೀವನಾಧಾರವಾಗಿದೆ. ಆದರೆ, ಪಡಿತರ ಚೀಟಿ ಇಲ್ಲದ ಕಾರಣ ‘ಅನ್ನಭಾಗ್ಯ’ದಂತಹ ಮಹತ್ವದ ಯೋಜನೆಗಳ ಸೌಲಭ್ಯ ಇವರಿಗೆ ಮರೀಚಿಕೆಯಾಗಿದೆ. ಸಿಗುವ ಅಲ್ಪ ಪಿಂಚಣಿ ಹಣದಲ್ಲಿ ದುಬಾರಿ ಬೆಲೆ ತೆತ್ತು ಅಕ್ಕಿ ಹಾಗೂ ದಿನಸಿ ಸಾಮಗ್ರಿಗಳನ್ನು ಖರೀದಿಸುವುದು ಇವರಿಗೆ ಅಸಾಧ್ಯವಾಗಿದೆ.
“ಈ ಇಳಿವಯಸ್ಸಿನಲ್ಲಿ ಬದುಕುವುದೇ ದುಸ್ತರವಾಗಿದೆ. ನನಗೆ ಸರ್ಕಾರದ ಯಾವುದೇ ಭಾಗ್ಯವೂ ಸಿಗುತ್ತಿಲ್ಲ, ಹೊಟ್ಟೆಗೆ ಅನ್ನವೂ ಇಲ್ಲದಂತಾಗಿದೆ. ದಯವಿಟ್ಟು ನನಗೊಂದು ಪಡಿತರ ಚೀಟಿ ಮಾಡಿಸಿಕೊಟ್ಟು ಬದುಕಲು ದಾರಿ ಮಾಡಿಕೊಡಿ” ಎಂದು ವನಜ ಶೆಡ್ತಿ ಅವರು ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳ ಬಳಿ ಕಣ್ಣೀರಿಡುತ್ತಾ ಮನವಿ ಮಾಡುತ್ತಿದ್ದಾರೆ. ಇನ್ನಾದರೂ ಸಂಬಂಧಪಟ್ಟ ಇಲಾಖೆಯ ಅಧಿಕಾರಿಗಳು ಇತ್ತ ಗಮನಹರಿಸಿ, ಈ ವೃದ್ಧೆಯ ಕಷ್ಟಕ್ಕೆ ಸ್ಪಂದಿಸುವರೇ ಎಂಬುದನ್ನು ಕಾದು ನೋಡಬೇಕಿದೆ.

