ಹೊಸನಗರ : ತಾಲೂಕಿನ ಕೋಡೂರು ಗ್ರಾ.ಪಂ. ವ್ಯಾಪ್ತಿಯ ಹಿಂಡ್ಲೆಮನೆ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯ ಬಾವಿಗೆ ಅಳವಡಿಸಲಾಗಿದ್ದ ವಿದ್ಯುತ್ ಪಂಪ್ಸೆಟ್ ಮತ್ತು ಕೇಬಲ್ ಕಳ್ಳತನವಾಗಿರುವ ಘಟನೆ ತಡರಾತ್ರಿ ನಡೆದಿದೆ.
ಘಟನಾ ವಿವರ :
ಶಾಲೆಯ ಕುಡಿಯುವ ನೀರಿನ ಬಳಕೆಗೆ ಬಾವಿಗೆ ಅಳವಡಿಸಲಾಗಿದ್ದ 1.5 ಹೆಚ್.ಪಿ. ಸಬ್ಮರ್ಸಿಬಲ್ ಪಂಪ್ಸೆಟ್ ಜು.30 ರಂದು ಸುಟ್ಟುಹೋಗಿದ್ದು ಇದನ್ನು ಎಲೆಕ್ಟ್ರಿಶಿಯನ್ ಸಹಾಯದಿಂದ ಮೇಲೆತ್ತಿ ಮೋಟಾರ್ ಅನ್ನು ದುರಸ್ತಿಗೆ ಕೊಡಲಾಗಿತ್ತು. ಪಂಪ್ ಮತ್ತು ಕೇಬಲ್ ಶಾಲೆಯ ಆವರಣದ ಬಾವಿಯ ಬಳಿಯಲ್ಲೇ ಇಡಲಾಗಿತ್ತು. ಇದೇ ಸರಿಯಾದ ಸಮಯ ಎಂದು ಕಾದ ಖದೀಮರು ಸುಮಾರು ₹ 4 ಸಾವಿರ ಮೌಲ್ಯದ ವಿದ್ಯುತ್ ಕೇಬಲ್ ಮತ್ತು ₹ 6 ಸಾವಿರ ಮೌಲ್ಯದ ವಿದ್ಯುತ್ ಮೋಟಾರ್ನ ಪಂಪ್ ಅನ್ನು ತಡರಾತ್ರಿ ಕಳವು ಮಾಡಿಕೊಂಡು ಹೋಗಲಾಗಿದೆ.
ಶಾಲಾ ಶಿಕ್ಷಕರರು ಮತ್ತು ಸಿಬ್ಬಂದಿಗಳು ಎಂದಿನಂತೆ ಶನಿವಾರ ಶಾಲೆಗೆ ಆಗಮಿಸಿದ ಸಂದರ್ಭದಲ್ಲಿ ಮೋಟಾರ್ ಕೇಬಲ್ ಮತ್ತು ಪಂಪ್ ಕಾಣೆಯಾಗಿರುವುದು ಗಮನಕ್ಕೆ ಬಂದಿದೆ. ಕೂಡಲೇ ಎಸ್ಡಿಎಂಸಿ, ಅಧಿಕಾರಿಗಳು ಮತ್ತು ಗ್ರಾಮಸ್ಥರ ಗಮನಕ್ಕೆ ತಂದಿದ್ದಾರೆ.
ಘಟನೆ ಸಂಬಂಧ ರಿಪ್ಪನ್ಪೇಟೆ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಕಳ್ಳತನದ ಬಗ್ಗೆ ಪರಿಶೀಲನೆ ನಡೆಸಲಾಗುತ್ತಿದೆ.
