ಕೋಣಂದೂರಿನಲ್ಲಿ ರಂಗೇರಿದ ನವರಾತ್ರಿ: ರೋಟರಿ ಸದಸ್ಯರ ‘ದಾಂಡಿಯಾ’ ಸ್ಟೆಪ್ಸ್‌ಗೆ ಎಲ್ರೂ ಫಿದಾ!

ಶಿವಮೊಗ್ಗ: ನಾಡಹಬ್ಬ ನವರಾತ್ರಿಯ ಪ್ರಯುಕ್ತ ಕೋಣಂದೂರು ರೋಟರಿ ಕ್ಲಬ್ ವತಿಯಿಂದ ಸ್ಥಳೀಯ ರೋಟರಿ ಭವನದಲ್ಲಿ ವಿಶೇಷ ‘ದಾಂಡಿಯಾ ನೃತ್ಯೋತ್ಸವ’ವನ್ನು ಅದ್ಧೂರಿಯಾಗಿ ಆಚರಿಸಲಾಯಿತು.

ಹಬ್ಬದ ಸಡಗರಕ್ಕಾಗಿ ಸಾಂಪ್ರದಾಯಿಕ ಹಾಗೂ ವರ್ಣರಂಜಿತ ಉಡುಗೆಗಳಲ್ಲಿ ಕಂಗೊಳಿಸಿದ ಕ್ಲಬ್ ಸದಸ್ಯರು ಮತ್ತು ಮಹಿಳೆಯರು, ಸಂಗೀತದ ತಾಳಕ್ಕೆ ತಕ್ಕಂತೆ ದಾಂಡಿಯಾ ಕೋಲುಗಳನ್ನು ಬಡಿಯುತ್ತಾ ಹುರುಪಿನಿಂದ ಹೆಜ್ಜೆ ಹಾಕಿದರು. ಸದಸ್ಯರ ಈ ಉತ್ಸಾಹಭರಿತ ನೃತ್ಯವು ಇಡೀ ಕಾರ್ಯಕ್ರಮಕ್ಕೆ ವಿಶೇಷ ಕಳೆ ತಂದುಕೊಟ್ಟಿತು.

ಸಂಭ್ರಮಾಚರಣೆಯನ್ನುದ್ದೇಶಿಸಿ ಮಾತನಾಡಿದ ರೋಟರಿ ಕ್ಲಬ್ ಅಧ್ಯಕ್ಷ ಕೆ.ಎಂ. ಸಂದೇಶ್ ಕುಮಾರ್ ಅವರು, “ನವರಾತ್ರಿಯು ಕೇವಲ ಶಕ್ತಿಯ ಆರಾಧನೆ ಮಾತ್ರವಲ್ಲದೆ, ಭಾರತೀಯ ಸನಾತನ ಸಂಸ್ಕೃತಿ ಹಾಗೂ ಪರಂಪರೆಯನ್ನು ಎತ್ತಿಹಿಡಿಯುವ ಹಬ್ಬವಾಗಿದೆ. ಇಂದಿನ ಯಾಂತ್ರಿಕ ಹಾಗೂ ಒತ್ತಡದ ಬದುಕಿನಲ್ಲಿ ಮನಸ್ಸಿಗೆ ಉಲ್ಲಾಸ ನೀಡಲು ದಾಂಡಿಯಾದಂತಹ ಸಾಂಸ್ಕೃತಿಕ ಕಾರ್ಯಕ್ರಮಗಳು ಅತ್ಯವಶ್ಯಕ. ಇಂತಹ ವೇದಿಕೆಗಳು ಸದಸ್ಯರ ನಡುವೆ ಬಾಂಧವ್ಯ, ಸ್ನೇಹ ಮತ್ತು ಒಗ್ಗಟ್ಟನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತವೆ. ನಮ್ಮ ಶ್ರೀಮಂತ ಸಂಪ್ರದಾಯವನ್ನು ಉಳಿಸಿ, ಮುಂದಿನ ಪೀಳಿಗೆಗೆ ದಾಟಿಸುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ” ಎಂದು ಅಭಿಪ್ರಾಯಪಟ್ಟರು.

ಹಬ್ಬದ ಆಚರಣೆಯ ಜೊತೆಗೆ ಪರಸ್ಪರ ಸೌಹಾರ್ದತೆ ಹಾಗೂ ಆತ್ಮೀಯತೆಯನ್ನು ಹಂಚಿಕೊಳ್ಳಲು ಈ ಕಾರ್ಯಕ್ರಮ ಸಾಕ್ಷಿಯಾಯಿತು. ರೋಟರಿ ಕ್ಲಬ್‌ನ ಪದಾಧಿಕಾರಿಗಳು, ಸದಸ್ಯರು ಹಾಗೂ ಅವರ ಕುಟುಂಬಸ್ಥರು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡು ದಾಂಡಿಯಾ ಸಂಭ್ರಮವನ್ನು ಯಶಸ್ವಿಗೊಳಿಸಿದರು.