ಹೊಸನಗರ: ಕೆಲವು ವ್ಯಕ್ತಿಗಳು ತಮ್ಮ ವೃತ್ತಿಯ ಮೂಲಕ ಕೇವಲ ಸಂಬಳವನ್ನಷ್ಟೇ ಸಂಪಾದಿಸುವುದಿಲ್ಲ. ಬದಲಾಗಿ, ಜನರ ಪ್ರೀತಿ, ವಿಶ್ವಾಸ ಮತ್ತು ಗೌರವವನ್ನೂ ಗಳಿಸುತ್ತಾರೆ. ಅಂತಹ ಅಪರೂಪದ ವ್ಯಕ್ತಿತ್ವಗಳಲ್ಲಿ ಒಬ್ಬರು ಎನ್. ಮೂರ್ತಿ ಕಾಮತ್.
ಸುಮಾರು 35 ವರ್ಷಗಳ ಸುದೀರ್ಘ ಸೇವಾ ಪಯಣವನ್ನು ಪ್ರಾಮಾಣಿಕತೆ, ಸರಳತೆ ಮತ್ತು ಜನಸ್ನೇಹಿ ಮನೋಭಾವದೊಂದಿಗೆ ಮುಗಿಸಿ ನಿವೃತ್ತಿ ಜೀವನಕ್ಕೆ ಕಾಲಿಡುತ್ತಿರುವ ಅವರಿಗೆ ಹೃದಯಪೂರ್ವಕ ಅಭಿನಂದನೆಗಳು.
ಬ್ಯಾಂಕ್‌ಗೂ ಜನರಿಗೂ ನಡುವೆ ನಂಬಿಕೆಯ ಸೇತುವೆಯಾಗಿದ್ದವರು!
1985ರಿಂದ 2000ರ ಕಾಲಘಟ್ಟದಲ್ಲಿ ಕೋಡೂರು ಗ್ರಾಮದಲ್ಲಿ ಕೆನರಾ ಬ್ಯಾಂಕ್ ತನ್ನ ವ್ಯವಹಾರವನ್ನು ವಿಸ್ತರಿಸಿಕೊಳ್ಳುತ್ತಿದ್ದ ದಿನಗಳು. ಅಂದು ಬ್ಯಾಂಕಿಂಗ್ ವ್ಯವಹಾರ ಇಂದಿನಷ್ಟು ಸುಲಭವಾಗಿರಲಿಲ್ಲ. ಜನಸಾಮಾನ್ಯರಿಗೆ ಬ್ಯಾಂಕ್‌ನ ಕಾರ್ಯವಿಧಾನಗಳ ಬಗ್ಗೆ ಹೆಚ್ಚಿನ ಪರಿಚಯವೂ ಇರಲಿಲ್ಲ. ಬ್ಯಾಂಕ್‌ಗೆ ಹೋಗುವುದು, ಹಣ ಜಮೆ ಮಾಡುವುದು, ಖಾತೆ ನಿರ್ವಹಿಸುವುದು ಎಂದರೆ ಹಲವರಿಗೆ ಹೊಸ ಅನುಭವವಾಗಿತ್ತು. ಅಂತಹ ಸಂದರ್ಭದಲ್ಲಿ ಪಿಗ್ಮಿ ಕಲೆಕ್ಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಮೂರ್ತಿ ಕಾಮತ್ ಅವರು ಬ್ಯಾಂಕ್ ಮತ್ತು ಗ್ರಾಮಸ್ಥರ ನಡುವಿನ ವಿಶ್ವಾಸದ ಕೊಂಡಿಯಾಗಿ ಗುರುತಿಸಿಕೊಂಡರು.
ಆರಂಭದ ದಿನಗಳಲ್ಲಿ ಬ್ಯಾಂಕ್‌ನಲ್ಲಿ ವ್ಯವಹಾರ ನಡೆಸುತ್ತಿದ್ದವರು ಬೆರಳೆಣಿಕೆಯಷ್ಟು ಜನರು ಮಾತ್ರ. ಆದರೆ ಮೂರ್ತಿ ಕಾಮತ್ ಅವರ ಸರಳ ನಡೆ, ಆತ್ಮೀಯ ಮಾತು ಮತ್ತು ವಿಶ್ವಾಸಾರ್ಹ ಸೇವೆಯಿಂದ ಕ್ರಮೇಣ ಹೆಚ್ಚಿನ ಜನರು ಬ್ಯಾಂಕಿಂಗ್ ವ್ಯವಹಾರದತ್ತ ಆಕರ್ಷಿತರಾದರು.
ಅಂದಿನ ದಿನಗಳಲ್ಲಿ ಕೋಡೂರಿನ ಅನೇಕ ಕುಟುಂಬಗಳು ದಿನಕ್ಕೆ 5 ಅಥವಾ 10 ರೂಪಾಯಿಯಂತೆ ಅಲ್ಪ ಮೊತ್ತವನ್ನು ಉಳಿತಾಯ ಮಾಡುತ್ತಿದ್ದವು. ಆ ಹಣದ ಹಿಂದೆ ದೊಡ್ಡ ಆರ್ಥಿಕ ಸಾಮರ್ಥ್ಯವಿರಲಿಲ್ಲ. ಆದರೆ ಭವಿಷ್ಯದ ಬದುಕಿನ ಬಗ್ಗೆ ಇದ್ದ ಸಣ್ಣ ಆಸೆ ಮತ್ತು ಉಳಿತಾಯದ ಮಹತ್ವದ ಅರಿವಿತ್ತು.
ಆ ಹಣವನ್ನು ಕೆನರಾ ಬ್ಯಾಂಕ್‌ನ ಪಿಗ್ಮಿ ಖಾತೆಗೆ ಜಮೆ ಮಾಡುತ್ತಿದ್ದ ಜನರಿಗೆ ಬ್ಯಾಂಕ್‌ನ ಮೇಲಿದ್ದ ನಂಬಿಕೆಯಷ್ಟೇ ಮೂರ್ತಿ ಕಾಮತ್ ಅವರ ಮೇಲೆಯೂ ಅಪಾರ ವಿಶ್ವಾಸವಿತ್ತು. ಬ್ಯಾಂಕ್‌ನ ವ್ಯವಹಾರಕ್ಕೆ ಸಂಬಂಧಿಸಿದ ಯಾವುದೇ ಸಹಾಯ ಬೇಕಾದರೂ ಮೊದಲು ನೆನಪಾಗುತ್ತಿದ್ದ ವ್ಯಕ್ತಿ ಇವರೇ ಆಗಿದ್ದರು.
ಹಣಕ್ಕಿಂತ ಮಿಗಿಲಾದದ್ದು ಜನರ ವಿಶ್ವಾಸ!
ಪಿಗ್ಮಿ ಕಲೆಕ್ಟರ್ ಕೆಲಸವೆಂದರೆ ಕೇವಲ ಮನೆಮನೆಗೆ ತೆರಳಿ ಹಣ ಸಂಗ್ರಹಿಸುವ ಕೆಲಸವಲ್ಲ. ಪ್ರತಿದಿನ ನೂರಾರು ಜನರನ್ನು ಭೇಟಿಯಾಗುವುದು, ಅವರ ಕಷ್ಟ-ಸುಖಗಳನ್ನು ಆಲಿಸುವುದು, ಸಣ್ಣ ಮೊತ್ತದ ಉಳಿತಾಯಕ್ಕೂ ಗೌರವ ನೀಡುವುದು ಮತ್ತು ಪ್ರತಿಯೊಬ್ಬ ಗ್ರಾಹಕರ ವಿಶ್ವಾಸವನ್ನು ಉಳಿಸಿಕೊಳ್ಳುವುದು ಅಷ್ಟೇ ಮುಖ್ಯ. ಈ ಎಲ್ಲ ಜವಾಬ್ದಾರಿಗಳನ್ನು ಮೂರ್ತಿ ಕಾಮತ್ ಅವರು ಅತ್ಯಂತ ನಿಷ್ಠೆಯಿಂದ ನಿರ್ವಹಿಸಿದರು.
ಕೋಡೂರು ಮಾತ್ರವಲ್ಲದೆ ಸುತ್ತಮುತ್ತಲಿನ ಗ್ರಾಮಗಳ ಜನರೊಂದಿಗೂ ಉತ್ತಮ ಬಾಂಧವ್ಯ ಬೆಳೆಸಿಕೊಂಡು ಕೆನರಾ ಬ್ಯಾಂಕ್‌ನ ವ್ಯವಹಾರ ವಿಸ್ತರಣೆಗೆ ತಮ್ಮದೇ ಆದ ಕೊಡುಗೆ ನೀಡಿದರು. ಅವರ ಪರಿಶ್ರಮದಿಂದ ಬ್ಯಾಂಕ್ ಜನಸಾಮಾನ್ಯರ ಬದುಕಿನ ಅವಿಭಾಜ್ಯ ಭಾಗವಾಗತೊಡಗಿತು.
ಸುದೀರ್ಘ ಸೇವಾವಧಿಯಲ್ಲಿ ಹಣಕಾಸಿನ ವ್ಯವಹಾರದಲ್ಲಿ ಪ್ರಾಮಾಣಿಕತೆಯನ್ನು ಕಾಪಾಡಿಕೊಂಡು, ತಮ್ಮ ಮೇಲೆ ಇಟ್ಟಿದ್ದ ಜನರ ವಿಶ್ವಾಸಕ್ಕೆ ಎಂದಿಗೂ ಚ್ಯುತಿ ಬಾರದಂತೆ ನಡೆದುಕೊಂಡಿರುವುದು ಅವರ ವ್ಯಕ್ತಿತ್ವದ ದೊಡ್ಡ ಹೆಗ್ಗಳಿಕೆ. ಯಾಕೆಂದರೆ ಹಣದ ವ್ಯವಹಾರದಲ್ಲಿ ನಂಬಿಕೆ ಗಳಿಸುವುದು ಸುಲಭದ ಮಾತಲ್ಲ. ಆದರೆ ಒಮ್ಮೆ ಗಳಿಸಿದ ನಂಬಿಕೆಯನ್ನು ದಶಕಗಳ ಕಾಲ ಉಳಿಸಿಕೊಳ್ಳುವುದು ಅದಕ್ಕಿಂತಲೂ ದೊಡ್ಡ ಸಾಧನೆ.
ಸೇವಾ ಮನೋಭಾವದ ಪರಂಪರೆಯ ಕುಟುಂಬ!
ಮೂರ್ತಿ ಕಾಮತ್ ಅವರ ಜೀವನದ ಮತ್ತೊಂದು ವಿಶೇಷವೆಂದರೆ ಅವರ ಕುಟುಂಬದ ಸಾಮಾಜಿಕ ಕಾಳಜಿ ಮತ್ತು ಆತಿಥ್ಯ ಪರಂಪರೆ. ಅವರ ತಂದೆ-ತಾಯಿ ಕೋಡೂರಿನಲ್ಲಿ ಹಲವು ವರ್ಷಗಳ ಕಾಲ ‘ಕಾಮತ್ ಹೋಟೆಲ್’ ನಡೆಸುತ್ತಾ ಗ್ರಾಮದ ಜನರ ಹಸಿವು ನೀಗಿಸುವ ಕಾಯಕದಲ್ಲಿ ತೊಡಗಿಸಿಕೊಂಡಿದ್ದರು. ಹೋಟೆಲ್ ಎಂದರೆ ಕೇವಲ ವ್ಯಾಪಾರದ ಸ್ಥಳವಾಗಿರದೆ, ಊರಿನ ಜನರು ಆತ್ಮೀಯವಾಗಿ ಬಂದು ಹೋಗುವ ಒಂದು ನೆಚ್ಚಿನ ತಾಣವಾಗಿತ್ತು.
ಮದುವೆಯ ನಂತರ ಮೂರ್ತಿ ಕಾಮತ್ ಅವರ ಧರ್ಮಪತ್ನಿ ಮಮತಾ ಕಾಮತ್ ಅವರೂ ಅತ್ತೆ-ಮಾವಂದಿರೊಂದಿಗೆ ಹೋಟೆಲ್ ವ್ಯವಹಾರದಲ್ಲಿ ಕೈಜೋಡಿಸಿ ಕುಟುಂಬದ ಜವಾಬ್ದಾರಿಯನ್ನು ಸಮರ್ಥವಾಗಿ ನಿಭಾಯಿಸಿದರು.
ಅಂದು ಕೋಡೂರಿನ ಜನರು ಆ ಹೋಟೆಲ್ ಅನ್ನು ಪ್ರೀತಿಯಿಂದ ‘ಅಮ್ಮನ ಹೋಟೆಲ್’ ಎಂದೇ ಕರೆಯುತ್ತಿದ್ದರು. ಆ ಹೆಸರಿನಲ್ಲಿಯೇ ಅಲ್ಲಿನ ಆತ್ಮೀಯತೆ, ತಾಯಿಯ ಮಮತೆ ಮತ್ತು ಅನ್ನದಾನದ ಸಾರ್ಥಕತೆ ಅಡಗಿತ್ತು.
ಹಸಿದು ಬಂದವರಿಗೆ ಊಟ ನೀಡುವುದು, ಪರಿಚಿತರನ್ನು ಪ್ರೀತಿಯಿಂದ ಮಾತನಾಡಿಸುವುದು, ಊರಿನ ಜನರೊಂದಿಗೆ ಆತ್ಮೀಯ ಸಂಬಂಧ ಬೆಳೆಸಿಕೊಳ್ಳುವುದು ಈ ಕುಟುಂಬದ ಸಹಜ ಗುಣವಾಗಿತ್ತು. ಮಧ್ಯಾಹ್ನದ ಊಟಕ್ಕಾಗಿ ಮನೆಗೆ ಬಂದು ಊಟ ಮಾಡುತ್ತಿದ್ದವರಿಗೂ ಆ ಮನೆಯ ಬಾಗಿಲು ತೆರೆದಿರುತ್ತಿದ್ದ ದಿನಗಳಿದ್ದವು.
ಕಾಲಕ್ರಮೇಣ ತಂದೆ-ತಾಯಿಯ ವಯೋಸಹಜ ನಿಧನದ ನಂತರ ಹೋಟೆಲ್ ವ್ಯವಹಾರ ಸ್ಥಗಿತಗೊಂಡಿತು. ಆದರೆ ಆ ಮನೆಯ ಆತಿಥ್ಯ, ಅನ್ನದಾನದ ನೆನಪುಗಳು ಇಂದಿಗೂ ಕೋಡೂರಿನ ಹಿರಿಯರು ಹಾಗೂ ಅಂದಿನ ದಿನಗಳನ್ನು ಕಂಡವರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿವೆ.
ನಿವೃತ್ತಿ ಬದುಕಿಗೆ ಹೊಸ ಅಧ್ಯಾಯ!
ವೃತ್ತಿ ಜೀವನದಲ್ಲಿ ಹಲವು ಏಳು-ಬೀಳುಗಳನ್ನು ಕಂಡರೂ ತಮ್ಮ ಕರ್ತವ್ಯವನ್ನು ನಿಷ್ಠೆಯಿಂದ ನಿರ್ವಹಿಸಿದ ಮೂರ್ತಿ ಕಾಮತ್ ಅವರು ಇಂದು ತಮ್ಮ ಮಗಳು, ಅಳಿಯ ಹಾಗೂ ಮೊಮ್ಮಕ್ಕಳೊಂದಿಗೆ ಸಂತೋಷದ ನಿವೃತ್ತಿ ಜೀವನ ನಡೆಸುತ್ತಿದ್ದಾರೆ.
35 ವರ್ಷಗಳ ಸೇವಾ ಪಯಣದ ನಂತರ ಸಿಗುವ ಈ ವಿಶ್ರಾಂತಿ ಅವರ ಬದುಕಿನ ಮತ್ತೊಂದು ಸುಂದರ ಅಧ್ಯಾಯವಾಗಲಿ. ಸದಾ ಜನರೊಂದಿಗೆ ಬೆರೆತು, ತಮ್ಮ ಸರಳ ವ್ಯಕ್ತಿತ್ವದಿಂದ ಎಲ್ಲರ ಪ್ರೀತಿ ಗಳಿಸಿರುವ ಈ ದಂಪತಿಗಳಿಗೆ ದೇವರು ಉತ್ತಮ ಆರೋಗ್ಯ, ನೆಮ್ಮದಿ, ಸಂತೋಷ ಮತ್ತು ದೀರ್ಘಾಯುಷ್ಯವನ್ನು ಕರುಣಿಸಲಿ.
ಮುಂದಿನ ಪೀಳಿಗೆಗೆ ಮಾದರಿಯಾಗಲಿ ಇವರ ಬದುಕು!
ಇಂದಿನ ದಿನಗಳಲ್ಲಿ ಯಶಸ್ಸನ್ನು ಅಳೆಯಲು ಹಣ, ಆಸ್ತಿ, ಅಧಿಕಾರ ಮತ್ತು ಅಂತಸ್ತುಗಳನ್ನು ಮಾನದಂಡವಾಗಿಟ್ಟುಕೊಳ್ಳುವವರೇ ಹೆಚ್ಚು. ಆದರೆ ನಿಜವಾದ ಸಂಪಾದನೆ ಎಂದರೆ ನಾವು ಬದುಕಿದ ನಂತರವೂ ಜನರ ಮನಸ್ಸಿನಲ್ಲಿ ಉಳಿಯುವ ಒಳ್ಳೆಯ ನೆನಪುಗಳು ಮತ್ತು ಗೌರವ. ಮೂರ್ತಿ ಕಾಮತ್ ಅವರು ತಮ್ಮ ಸೇವೆಯ ಮೂಲಕ ಗಳಿಸಿರುವುದು ಇದೇ ಸಂಪತ್ತು.
ಒಂದು ಕಾಲದಲ್ಲಿ ದಿನಕ್ಕೆ 5 ರೂಪಾಯಿ, 10 ರೂಪಾಯಿ ಉಳಿತಾಯ ಮಾಡುತ್ತಿದ್ದ ಸಾಮಾನ್ಯ ಜನರ ವಿಶ್ವಾಸವನ್ನು ಗಳಿಸಿದವರು. ಬ್ಯಾಂಕ್‌ನ ವ್ಯವಹಾರವನ್ನು ಜನಸಾಮಾನ್ಯರಿಗೆ ಹತ್ತಿರವಾಗಿಸಿದವರು. ಕುಟುಂಬದ ಮೂಲಕ ಆತಿಥ್ಯ ಮತ್ತು ಅನ್ನದಾನದ ಪರಂಪರೆಯನ್ನು ಉಳಿಸಿಕೊಂಡವರು. ಹಣ ಸಂಪಾದಿಸುವವರು ಹಲವರಿರಬಹುದು, ಆದರೆ ಜನರ ಹೃದಯದಲ್ಲಿ ನಂಬಿಕೆಯ ಸ್ಥಾನ ಸಂಪಾದಿಸುವವರು ಬಹಳ ಅಪರೂಪ. ಮೂರ್ತಿ ಕಾಮತ್ ಅವರ ಬದುಕು ಅಂತಹ ನಂಬಿಕೆ, ಪ್ರಾಮಾಣಿಕತೆ ಮತ್ತು ಮಾನವೀಯತೆಯ ಸುಂದರ ಉದಾಹರಣೆ.
ನಿಮ್ಮ ಸೇವೆಗೆ ಒಂದು ಸಲಾಂ… ನಿಮ್ಮ ಪ್ರಾಮಾಣಿಕತೆಗೆ ಒಂದು ಗೌರವದ ನಮನ… ನಿಮ್ಮ ಸರಳ ಬದುಕಿಗೆ ಹೃದಯಪೂರ್ವಕ ಅಭಿನಂದನೆಗಳು.
ಮೂರ್ತಿ ಕಾಮತ್ ಹಾಗೂ ಮಮತಾ ಕಾಮತ್ ದಂಪತಿಗಳಿಗೆ ನಿವೃತ್ತಿ ಜೀವನದ ಶುಭಾಶಯಗಳು. ನಿಮ್ಮ ಮುಂದಿನ ಬದುಕು ಆರೋಗ್ಯ, ಆಯುರಾರೋಗ್ಯ, ನೆಮ್ಮದಿ ಮತ್ತು ಸಂತೋಷದಿಂದ ಕೂಡಿರಲಿ.
ನಿಮ್ಮ ಸೇವೆ ಮುಗಿದಿರಬಹುದು, ಆದರೆ ನೀವು ಗಳಿಸಿರುವ ಜನರ ಪ್ರೀತಿ ಮತ್ತು ವಿಶ್ವಾಸಕ್ಕೆ ಎಂದಿಗೂ ನಿವೃತ್ತಿಯಿಲ್ಲ!.
✍️ ಬರಹ: ಸಂತೋಷ್ ಕೆ.ಎಸ್.
BKS ಸ್ಟೋರ್ಸ್, ಕೋಡೂರು
