ರಿಪ್ಪನ್‌ಪೇಟೆ: ಶಿವಮೊಗ್ಗ ಜಿಲ್ಲಾ ಮಹಿಳಾ ಕಾಂಗ್ರೆಸ್ ಹೊಸ ಅಧ್ಯಾಯವನ್ನು ಬರೆಯಲಿರುವ ಶ್ವೇತಾ ಆರ್ ಬಂಡಿ. ನಾಳೆ (ಸೆಪ್ಟೆಂಬರ್ 27) ಅವರು ಜಿಲ್ಲಾ ಮಹಿಳಾ ಕಾಂಗ್ರೆಸ್ ಅಧ್ಯಕ್ಷೆಯಾಗಿ ಅಧಿಕೃತವಾಗಿ ಪದಗ್ರಹಣ ಮಾಡಲಿದ್ದಾರೆ. ಸರಳತೆ, ಸಜ್ಜನಿಕೆ ಮತ್ತು ಕರ್ತವ್ಯನಿಷ್ಠೆ ಅವರ ರಾಜಕೀಯ ಬದುಕಿನ ಆಧಾರಸ್ತಂಭಗಳಾಗಿದ್ದು, ಮಹಿಳಾ ಕಾಂಗ್ರೆಸ್ ಸಂಘಟನೆಗೆ ಹೊಸ ಚೈತನ್ಯ ತುಂಬುವ ನಾಯಕಿಯಾಗಿ ಪಕ್ಷದ ವಲಯಗಳಲ್ಲಿ ನಿರೀಕ್ಷೆ ಮೂಡಿಸಿದೆ.
ಪರಿಚಯ ;
ಶಿವಮೊಗ್ಗ ಜಿಲ್ಲೆಯ ಹೊಸನಗರ ತಾಲೂಕಿನ ಅಮೃತ ಗ್ರಾಮ ಪಂಚಾಯಿತಿಯ ಬಿದರ ಹಳ್ಳಿ ಗ್ರಾಮ ದಲ್ಲಿ ಜನಿಸಿದ ಶ್ವೇತಾ ಬಂಡಿ ಅವರ ರಾಜಕೀಯ ಜೀವನವು ಅತಿ ಚಿಕ್ಕ ವಯಸ್ಸಿನಲ್ಲಿಯೆ ರಿಪ್ಪನ್‌ಪೇಟೆ ಜಿಲ್ಲಾ ಪಂಚಾಯತ್ ಕ್ಷೇತ್ರದಿಂದ ಆರಂಭವಾಯಿತು. ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿಯಾಗಿ ಮೊದಲ ಬಾರಿಗೆ ಸ್ಪರ್ಧಿಸಿ ಜನರ ಪ್ರೀತಿ ಮತ್ತು ವಿಶ್ವಾಸದ ಆಧಾರದಲ್ಲಿ ಆಯ್ಕೆಯಾಗಿದ್ದ ಅವರು, ಜಿಲ್ಲೆಯ ಸಾರ್ವಜನಿಕ ಜೀವನದಲ್ಲಿ ತಕ್ಷಣವೇ ಗುರುತಿಸಿಕೊಂಡರು. ಅಧಿಕಾರದ ಅವಧಿಯಲ್ಲಿ ಪಕ್ಷಪಾತವಿಲ್ಲದೆ, ಹಿರಿಯ–ಕಿರಿಯರ ನಡುವೆ ಭೇದವಿಲ್ಲದೆ, ಸಂಪೂರ್ಣ ಪ್ರಾಮಾಣಿಕತೆ ಮತ್ತು ಕರ್ತವ್ಯನಿಷ್ಠೆಯೊಂದಿಗೆ ಜನಪರ ಕಾರ್ಯನಿರ್ವಹಣೆ ನಡೆಸಿದ ಪರಿಣಾಮ, ಸಾಮಾನ್ಯರ ಬದುಕಿಗೆ ಹತ್ತಿರವಾದ ನಾಯಕಿಯಾಗಿ ಅವರು ಹೆಸರು ಮಾಡಿದರು.
ಎಂಕಾಂ ಪದವಿದರೆಯಾದ ಶ್ವೇತಾ ಬಂಡಿ, ವಿದ್ಯಾರ್ಥಿನಿ ದಿನಗಳಿಂದಲೇ ಸಮಾಜಮುಖಿ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದರು. ತಮ್ಮ ಶಿಕ್ಷಣ ಮತ್ತು ಶಿಸ್ತಿನ ಹಾದಿಯಲ್ಲಿ ಬೆಳೆದ ಅವರು ಸಾರ್ವಜನಿಕ ಜೀವನದಲ್ಲಿ ಸದಾ ಜನಸೇವೆ ಎಂಬ ಧ್ಯೇಯವನ್ನು ಅಳವಡಿಸಿಕೊಂಡಿದ್ದಾರೆ. ಜನಸಾಮಾನ್ಯರ ಹಿತಾಸಕ್ತಿಯನ್ನು ಯಾವಾಗಲೂ ಮೆಟ್ಟಿಲುಗಳ ಮೇಲಿಟ್ಟಿರುವುದರಿಂದ, ಅವರ ನಾಯಕತ್ವ ಶೈಲಿ ಜನಮನವನ್ನು ಸ್ಪರ್ಶಿಸಿದೆ.
ಜಿಲ್ಲಾ ಪಂಚಾಯತ್ ಮಾಜಿ ಸದಸ್ಯರಾದ ರಾಮಚಂದ್ರ ಬಂಡಿ ಅವರ ಪುತ್ರಿಯಾಗಿರುವ ಶ್ವೇತಾ ಬಂಡಿ, ಮಾವ ಮೂರ್ತಿರಾವ್ ಎಸ್ ಕೆ ಹಾಗೂ ಪತಿ ವಕೀಲ ಭರತ್ ಎಂ ಅವರ ಮಾರ್ಗದರ್ಶನದಲ್ಲಿ ರಾಜಕೀಯದಲ್ಲಿ ಹಾದಿ ಮಾಡಿಕೊಳ್ಳಲು ಕುಟುಂಬದ ನಂಟು ನೆರವಾದರೂ, ತಮ್ಮದೇ ಶ್ರಮ ಮತ್ತು ವ್ಯಕ್ತಿತ್ವದಿಂದಲೇ ಜನಪ್ರತಿನಿಧಿಯಾಗಿ ಮೂಡಿಬಂದಿದ್ದಾರೆ. ಜಿಲ್ಲೆಯ ಹಿರಿಯ ಕಾಂಗ್ರೆಸ್ ಮುಖಂಡರಾದ ಕಾಗೋಡು ತಿಮ್ಮಪ್ಪ, ಮಾಜಿ ಶಿಕ್ಷಣ ಸಚಿವ ಕಿಮ್ಮನೆ ರತ್ನಾಕರ್, ಹಾಲಿ ಶಿಕ್ಷಣ ಸಚಿವ ಮಧು ಬಂಗಾರಪ್ಪ, ಶಾಸಕರಾದ ಗೋಪಾಲಕೃಷ್ಣ ಬೇಳೂರು, ವಿಧಾನ ಪರಿಷತ್ ಸದಸ್ಯ ಮಂಜುನಾಥ ಭಂಡಾರಿ ಮಲೆನಾಡು ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಆರ್.ಎಂ. ಮಂಜುನಾಥ್ ಗೌಡ, ಜಿಲ್ಲಾ ಪಂಚಾಯತ್ ಮಾಜಿ ಅಧ್ಯಕ್ಷ ಕಲಗೋಡು ರತ್ನಾಕರ ಮತ್ತಿತರ ನಾಯಕರ ಮಾರ್ಗದರ್ಶನದಲ್ಲಿ ಅವರು ಕಾರ್ಯನಿರ್ವಹಿಸಿದ್ದು, ಸಂಘಟನೆಗೆ ಬದ್ಧ ನಾಯಕಿಯಾಗಿ ಬೆಳೆದಿದ್ದಾರೆ.
ಅವರ ಆಡಳಿತ ಶೈಲಿಯ ವಿಶೇಷತೆ ಎಂದರೆ ಸರಳತೆ. ಯಾವುದೇ ಹುದ್ದೆ, ಹಂತ, ಸ್ಥಾನಮಾನಗಳಿಂದ ಪ್ರಭಾವಿತರಾಗದೇ, ಸಾಮಾನ್ಯರ ಸಮಸ್ಯೆಗಳಿಗೆ ಸ್ಪಂದಿಸುವ ಶಕ್ತಿ ಅವರಲ್ಲಿ ಸ್ಪಷ್ಟವಾಗಿ ಕಾಣುತ್ತದೆ. ರಾಜಕೀಯದಲ್ಲಿ ಕೆಲವರು ಅಧಿಕಾರದ ಪ್ರಭಾವದಿಂದ ದೂರವಾಗುತ್ತಿದ್ದರೆ, ಶ್ವೇತಾ ಬಂಡಿ ತಮ್ಮ ಹುದ್ದೆಯ ಮೂಲಕ ಸದಾ ಜನರಿಗೆ ಹತ್ತಿರವಾಗಿರುವ ನಾಯಕಿಯಾಗಿ ಹೊರಹೊಮ್ಮಿದ್ದಾರೆ.
ನಾಳೆಯ ಪದಗ್ರಹಣ ಸಮಾರಂಭವು ಕೇವಲ ಹುದ್ದೆ ಸ್ವೀಕಾರದ ಆಚರಣೆ ಮಾತ್ರವಲ್ಲ, ಜಿಲ್ಲಾ ಮಹಿಳಾ ಕಾಂಗ್ರೆಸ್ ಸಂಘಟನೆಯ ಹೊಸ ಉತ್ಸಾಹದ ಸಂಕೇತವಾಗಲಿದೆ ಎಂಬ ಅಭಿಪ್ರಾಯ ಪಕ್ಷದ ನಾಯಕರಲ್ಲಿದೆ. ಮಹಿಳೆಯರ ಸಮಸ್ಯೆಗಳಿಗೆ ಹೆಚ್ಚಿನ ಆದ್ಯತೆ ನೀಡುವ ಜೊತೆಗೆ, ಸಂಘಟನೆಗೆ ಬಲ ತುಂಬುವ ಕಾರ್ಯಶೈಲಿಯನ್ನು ಶ್ವೇತಾ ಬಂಡಿ ಅನುಸರಿಸುವರು ಎಂಬ ವಿಶ್ವಾಸವನ್ನು ಸಹೋದ್ಯೋಗಿಗಳು ವ್ಯಕ್ತಪಡಿಸುತ್ತಿದ್ದಾರೆ.
ಜಿಲ್ಲೆಯಲ್ಲಿ ಮಹಿಳಾ ಕಾಂಗ್ರೆಸ್ ಬಲವರ್ಧನೆಗೆ ಅವರ ನೇತೃತ್ವ ಪರಿಣಾಮಕಾರಿ ಆಗಲಿದೆ ಎಂಬ ನಿರೀಕ್ಷೆ ಹೆಚ್ಚುತ್ತಿದೆ. ವಿಶೇಷವಾಗಿ ಗ್ರಾಮೀಣ ಪ್ರದೇಶದ ಮಹಿಳೆಯರ ಸಬಲೀಕರಣ, ಶಿಕ್ಷಣ ಮತ್ತು ಸಾಮಾಜಿಕ ನ್ಯಾಯದ ವಿಚಾರಗಳಲ್ಲಿ ಶ್ವೇತಾ ಬಂಡಿ ಶ್ರಮಿಸಲಿದ್ದಾರೆ ಎಂಬ ಭರವಸೆ ಪಕ್ಷದ ವಲಯಗಳಲ್ಲಿ ಗಟ್ಟಿಯಾಗಿ ಕೇಳಿಬರುತ್ತಿದೆ.
ಹೀಗೆ, ಶ್ವೇತಾ ಆರ್ ಬಂಡಿ ಅವರ ಪದಗ್ರಹಣ ಸಮಾರಂಭವು ಜಿಲ್ಲೆಯ ರಾಜಕೀಯ ವಲಯಕ್ಕೆ ಹೊಸ ಚೈತನ್ಯವನ್ನು ತುಂಬಲಿದೆ. ಜನಪರ ಕಾರ್ಯವೈಖರಿಯನ್ನು ತಮ್ಮ ಹಳೆಯ ಹಾದಿಯಂತೆಯೇ ಮುಂದುವರಿಸಿ, ಮಹಿಳಾ ಕಾಂಗ್ರೆಸ್ ಸಂಘಟನೆಯನ್ನು ಬಲಪಡಿಸುವ ಭರವಸೆ ಅವರು ನೀಡಿದ್ದಾರೆ.
ವರದಿ : ಸಬಾಸ್ಟಿನ್ ಮ್ಯಾಥ್ಯೂಸ್
ಮಲೆನಾಡಿನ ಹೆಬ್ಬಾಗಿಲು ಶಿವಮೊಗ್ಗದ ಸ್ಥಳೀಯ ನ್ಯೂಸ್ ವೆಬ್‌ಸೈಟ್‌ಗಳಲ್ಲಿ ಪ್ರತಿನಿಧಿಯಾಗಿ ವೃತ್ತಿ ಜೀವನ ಪ್ರಾರಂಭ. ಪತ್ರಿಕೋದ್ಯಮದಲ್ಲಿ 7 ವರ್ಷಗಳ ಅನುಭವ. ಜಿಲ್ಲಾ ಮಟ್ಟದ ದಿನಪತ್ರಿಕೆಗಳಲ್ಲಿ ಹಾಗೂ ವೆಬ್‌ಸೈಟ್‌ಗಳಲ್ಲಿ ಮಲೆನಾಡಿಗೆ ಸಂಬಂಧಿಸಿದ ವಿಷಯಗಳ ಲೇಖನಗಳನ್ನು ಬರೆದಿದ್ದೇನೆ. ಪ್ರಸ್ತುತ ‘ಮಲ್ನಾಡ್ ಟೈಮ್ಸ್’ ಡಿಜಿಟಲ್ ನಲ್ಲಿ ಸಂಪಾದಕನಾಗಿ ಮುಂದುವರೆದಿದ್ದೇನೆ.
