ಸಾಗರ,:ಲಿಂಗನಮಕ್ಕಿ ಜಲಾಶಯದ ಎಲ್ಲಾ ಗೇಟ್ಗಳನ್ನು ಗುರುವಾರ ಪುನಃ ತೆರೆಯಲಾಗಿದೆ. ಇದರಿಂದ ಶರಾವತಿ ನದಿಯಲ್ಲಿ ನೀರಿನ ಹರಿವು ಹೆಚ್ಚಳಗೊಂಡಿದ್ದು, ಜೋಗ ಜಲಪಾತವು ಮೈದುಂಬಿ ಧುಮ್ಮಿಕ್ಕಿ ಹರಿಯುತ್ತಿದೆ. ಪ್ರವಾಸಿಗರಿಗೆ ಇದು ಕಣ್ತುಂಬ ದೃಶ್ಯಾವಳಿ ನೀಡುತ್ತಿದೆ.
ಕಳೆದ ಎರಡು ದಿನಗಳಿಂದ ಜಲಾನಯನ ಪ್ರದೇಶದಲ್ಲಿ ನಿರಂತರ ಮಳೆಯಾಗುತ್ತಿರುವುದರಿಂದ ಒಳಹರಿವು ಬಹಳ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಗುರುವಾರ ಲಿಂಗನಮಕ್ಕಿ ಜಲಾಶಯಕ್ಕೆ 47,232 ಕ್ಯೂಸೆಕ್ ಒಳಹರಿವು ದಾಖಲಾಗಿದ್ದು, ಈಗಾಗಲೇ ಜಲಾಶಯ ಪೂರ್ಣ ಸಾಮರ್ಥ್ಯಕ್ಕೆ ತುಂಬಿರುವುದರಿಂದ 32,138 ಕ್ಯೂಸೆಕ್ ನೀರನ್ನು ಹೊರಗೆ ಬಿಡಲಾಗಿದೆ.
ಕಳೆದ 24 ಗಂಟೆಗಳಲ್ಲಿ ಜಲಾಶಯದ ನೀರಿನ ಮಟ್ಟ 0.40 ಅಡಿ ಏರಿಕೆಯಾಗಿದೆ. ಗರಿಷ್ಠ 1819 ಅಡಿ ಸಾಮರ್ಥ್ಯ ಹೊಂದಿರುವ ಜಲಾಶಯದಲ್ಲಿ ಸದ್ಯ ನೀರಿನ ಮಟ್ಟ 1817.70 ಅಡಿ ತಲುಪಿದೆ.
ನೀರಿನ ಭಾರೀ ಹೊರಹರಿವಿನಿಂದ ಜೋಗ ಜಲಪಾತದ ಎಲ್ಲಾ ಹಂತಗಳು ಮೈದುಂಬಿ ಹರಿಯುತ್ತಿದ್ದು, ಪ್ರವಾಹದ ಸದ್ದು–ಗದ್ದಲದ ನಡುವೆ ಸಹಸ್ರಾರು ಲೀಟರ್ ನೀರು ಪ್ರತಿ ಕ್ಷಣವೂ ಧುಮ್ಮಿಕ್ಕುತ್ತಿದೆ. ಇದರ ಫಲವಾಗಿ ಜೋಗದ ಸೌಂದರ್ಯವು ಇನ್ನಷ್ಟು ಹೆಚ್ಚಳಗೊಂಡಿದೆ.
👉 ಪ್ರವಾಸಿಗರಿಗೆ ಎಚ್ಚರಿಕೆ:ನೀರಿನ ಅತಿ ಹೆಚ್ಚು ಹರಿವು ಹಿನ್ನೆಲೆಯಲ್ಲಿ ಶರಾವತಿ ತೀರದ ಗ್ರಾಮಸ್ಥರು ಮತ್ತು ಪ್ರವಾಸಿಗರು ಎಚ್ಚರಿಕೆ ವಹಿಸಲು ಆಡಳಿತವು ಸೂಚನೆ ನೀಡಿದೆ.
