ರಿಪ್ಪನ್‌ಪೇಟೆ : ಹೊಸನಗರ ತಾಲೂಕಿನ ಹರಿದ್ರಾವತಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಸೇರುವ ನಂದಿಹೊಳೆಯಲ್ಲಿ, ವಿಜಯನಗರ ಸಾಮ್ರಾಜ್ಯದ ನಂತರದ ಕಾಲಘಟ್ಟಕ್ಕೆ ಸೇರಿದ ಅಪರೂಪದ ವೀರಗಲ್ಲೊಂದನ್ನು ಇತಿಹಾಸ ಸಂಶೋಧಕರಾದ ಆದಿತ್ಯ ನಂಜವಳ್ಳಿ ಮತ್ತು ವಡಗೆರೆ ಸುದರ್ಶನ್‌ಸಿಂಗ್ ಪತ್ತೆ ಮಾಡಿದ್ದಾರೆ.
ಶಿಲ್ಪದ ವಿಶೇಷತೆಗಳು:
ಸುಮಾರು 2 ಅಡಿ ಎತ್ತರ ಹಾಗೂ 3 ಅಡಿ ಅಗಲವಿರುವ ಈ ಕಲ್ಲಿನಲ್ಲಿ, ಹುಲಿಯೊಡನೆ ಕಾದಾಡಿ ಪ್ರಾಣತೆತ್ತ ವೀರ, ಆತನ ಜೊತೆಗಾರ ಹಾಗೂ ಆತನ ಪತ್ನಿಯು ಸಹಗಮನ (ಸತಿ) ಹೋದ ದೃಶ್ಯವನ್ನು ಕೆತ್ತಲಾಗಿದೆ. ಇದರ ಜೊತೆಗೆ ಸೂರ್ಯ, ಚಂದ್ರ, ಶಿವಲಿಂಗ, ಹಸು-ಕರು ಹಾಗೂ ಬೇಟೆ ನಾಯಿಯ ಆಕೃತಿಗಳನ್ನೂ ಇದರಲ್ಲಿ ಮೂಡಿಸಲಾಗಿದೆ.
ರಾಜ್ಯ ಪುರಾತತ್ವ ಇಲಾಖೆಯ ನಿರ್ದೇಶಕರಾದ ಡಾ. ಶೇಜೇಶ್ವರ ಅವರು ಇದು ವಿಜಯನಗರೋತ್ತರ ಕಾಲದ ಕಲಾಕೃತಿಯಾಗಿರಬಹುದು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಈ ವೀರಗಲ್ಲನ್ನು ಬೇರೆಡೆಯಿಂದ ತಂದು ನದಿಗೆ ಎಸೆದಿರುವ ಸಾಧ್ಯತೆಗಳಿದ್ದು, ಇದರ ಹಿಂದಿರುವ ನಿಖರವಾದ ಐತಿಹಾಸಿಕ ಹಿನ್ನೆಲೆ, ಕಾಲಘಟ್ಟ ಮತ್ತು ಮೂಲ ಸ್ಥಳದ ಬಗ್ಗೆ ಇನ್ನಷ್ಟು ಆಳವಾದ ಸಂಶೋಧನೆ ನಡೆಯಬೇಕಿದೆ ಎಂದು ಸಂಶೋಧಕ ಆದಿತ್ಯ ನಂಜವಳ್ಳಿ ಮಾಧ್ಯಮಗಳಿಗೆ ಮಾಹಿತಿ ನೀಡಿದ್ದಾರೆ.
